أغانى حب مصرية وأغراضها السياسية

محمد منير:قلبى مساكن شعبية /الاغنية دى مهداه من وزير الاسكان لأهالى قلعة الكبش ردا على طلباتهم بتوفير مساكن لهم
عمرو دياب:الليلادى /الاغنية دى مهداه من وزير الداخلية الى قيادات الاخوان المسلمين بمناسبة تبشيرهم انه سيتم القبض عليهم هذا المساء
عمرو دياب:ذكريات /الاغنية دى اهداها المستمع العزيز احمد عز لصديقه الكريم كمال الشاذلى
عمرو دياب:تملى معاك /رؤساء تحرير الصحف الحكومية فى مرافقتهم الرئيس مبارك فى رحلاته الاوروبية
نانسى عجرم:اه ونص /رد الرئيس مبارك على سؤال من أحد الصحفيين فى مسألة توريث الحكم
نانسى عجرم:أنت ايه /الاغنية دى مهداه من الشعب المصرى كله للرئيس مبارك بمناسبة مرور 26 عاما على توليه الحكم
نانسى عجرم:شخبط شخابيط /الاغنية دى مهداه من كل الفنانيين التشكيليين فى مصر للفنان الوزير فاروق حسنى
هانى شاكر:الحلم الجميل /الاغنية دى مهداه من وزير التعليم لكل المدرسيين فى مصر ردا على طلباتهم بتطبيق الكادر الخاص

ان نحيا

ان نحيا" قصة فيلم مآساه للصين

واحداثه بنعيشها فى الحقيقة احنا المصريين

طب سؤال احنا المصريين عايشين ولا ميتين

الاجابة بلاش انتو اكيد عارفين

أن الظلم والفقر خلونا ميتين وفى الشوارع مرميين

ان نحيا هو عنوان فيلم صينى عرض لاول مرة فى مهرجان كان عام 1994 وقابل النقاد الفيلم بأهتمام بالغ وتقديرات عالية والفيلم يحكى قصة عائلة مكونة من شاب وزوجته وطفلته تعيش عيشة ميسورة ولكن الشاب داؤه القمار يظل يلعب ويخسر حتى يراهن على بيت الاب ويخسره ويموت الاب بحسرته وتتركه زوجته مع طفلتها وجنين فى أحشائها ويتلطم الشاب بين الازقه بحثا عن مأوى وطعام حتى يجد رفيق له ينصحه بان يشغل مهارته فى تحريك العرائس الورقية ويكون هو ورفيقه فرقة صغيرة تقدم عروضها عبر القرى المجاورة ثم يجد الشاب نفسه متورطا فى حرب أهلية ثم تنتهى الحرب وتقوم جمهورية الصين الشعبية ويعود الى قريته لتعود اليه زوجته ويستكملا الحياه معا واصبح طفله ولد اما طفلته فقد اصيبت بحمى تركتها بكماء ويواصل عمله فى عروض العرائس الورقية ولكن المآسى لا تتركهم فها هو الطفل يموت فى حادث سيارة وها هى الثورة الثقافية بقيادة ماو وتشتعل وتمتلىء الجدران والبيوت بصور ماو وكتب وتعاليم ماو ويتقدم عريس معوق الى ابنته البكماء ويوافق عليه فالعريس عضو فى حزب ماو ونأتى الى قمة المآسى عندما يحين موعد ولادة ابنته لطفلها الاول فالطبيب المسئول يرتشف بعض الخمر لذلك قرر حزب ماو معاقبته فربطوه بالحبال ومنعوا عنه الماء والطعام والقوا به فى الطريق يسرع اليه الاب يقدم الخبز بينما الابنة تصرخ من الالم وتلد طفلها وتصاب بنزيف حاد وتموت ................. مآسى متتالية ولكن البطل مازال قادرا على مواصلة الحياة يحمل الطفل المولود ويخرج مع زوجته الى بيتهما ..........وينتهى الفيلم
عزيزى القارىء بعد ما عرفت قصة الفيلم تفتكر أبطال الفيلم بالمآسى الى حصلتلهم كانوا عايشيين ولا ميتيين بالتاكيد كانوا ميتيين وتفتكر أحنا المصريين الفقراء البؤساء المظلوميين الى بيحصلنا اكتر من أبطال الفيلم الصينيين أحنا عايشيين ولا ميتيين ؟

مظلوم مهموم متضايق

مظلوم
مهموم
ضايع
مع انى مش خريج صنايع
دانا خريج جامعة
بس على عينى دمعة
علشان ظلمونى
ومش هيدونى
حقى المسلوب
وعملوا على ملعوب
قالولى متقفش فى وش الريح
مخفتش وبدأت اطيح
فى كل الى ظلمونى
لكنهم طردونى
من شغلى البسيط
وقالولى انت طيب وعبيط
قلنالك متقفش فى وش الريح
أديك بقيت مظلوم وجريح
بعد ما كنت مظلوم بس
دلوقتى مبقلكش حس
قلنالك معاك واسطة هتاخد حقك
ممعكش متفتحش بقك
حتى الى وقفوا معايا
باعونى فى النهاية
وقالولى مش واخدين بالنا
وسيبنا بقى فى حالنا
مظلوم
مهموم
متضايق
من كتر مشاكلى مش فايق
للى بيحصل معايا
حيران
الكوسة فى كل مكان
فى الشارع والكلية
ودار الوثائق القومية
حيران
اعمل ايه
الى عنده حل يقولى عليه
مظلوم
مهموم
متضايق

اعلان عن بيع انسان

اعلان
موجود فى مصر الان
على الحيطة فى كل مكان
اعلان عن بيع انسان
مواطن مصر الغلبان
كان نفسه يعيش فى امان
فى بلد ظلم وطغيان
اعلان عن بيع الحرية
فى بلدنا مصر العربية
اعلان عن بيع القومية
عن بيع الوحدة الوطنية
اعلان عن بيع الكلية
وفى امن الدولة محمية
عن بيع الشرطة المصرية
بس ادفع من الالف مية
اعلان عن بيع التعليم
فى بلدنا ما يجيب مليم
اعلان عن بيع الاعلام
وكله كلام فى كلام
قال ايه ديمقراطية
وشبابنا فى السجون مرمية
اعلان عن بيع الاحلام
وكمان عن بيع الاوهام
للشاب المصرى المتخرج
من الجامعة وعلى فشه بيتفرج
قالولك كتير فرص العمل
بس الكوسة هى الامل
ظبط نفسك يا ابنى وطلع
وادفع
للى ناويلك
على تشغيلك
اعلان عصرى
هنبيع الشعب المصرى
عمال وموظفين
وشباب متخرجين
فى الفقر مقهورين
مين يشترى مين
اعلان
موجود ف مصر الان
على الحيطة فى كل مكان

شيشرون: ياليته يحكم مصر الأن

106ماركوس توليوس شيشرون Marcus Tullius Cicero - شيشرون Cicero - ، الكاتب الروماني وخطيب روما المميز، ولد سنة ق.م، صاحب إنتاج ضخم يعتبر نموذجا مرجعيا للتعبير اللاتيني الكلاسيكي وصلنا لحسن الحظ جانب كبير منه، لقد أثارت شخصية
شيشرون الكثير من الجدل والتقويمات المتضاربة وخاصة في الجانب السياسي من حياته، فهو تارة مثقف مضيع في وسط سيء، وتارة أخرى ثري إيطالي صاعد في روما، وثالثة انتهازي متقلب و"أداة طيعة في يد الملكية" و"متملق لبومبي ثم سيزار" بحسب ثيودور
مومسين وجيروم كاركوبينو، ولكنه أيضا بحسب بيير كريمال الجسر الذي عبره وصلنا جانب من الفلسفة اليونانية.
ويمكن القول ان شيشرون لو كان فى عصرنا هذا لتغيرت كثير من الاحداث السياسية ولو كان شيشرون مصرى لكان اول المعترضين على توريث الحكم انه كان داهية فى الدفاع عن موكليه فى محاكم روما بل انه كان قادرا على ان يغير احداث روما الى 360 درجة اذا اراد ذلك انه قادر على ان يجعل المجرم برىء حتى لو شاهد القاضى المجرم وهو يرتكب جريمته لقد تمنيت اثنان يحكموا مصر الأن (صلاح الدين وشيشرون)

يا فضايحك يا مصر

ب2 جنيه تزور القلعة وتتفرج على المجرمين فى متحف الشرطة القومى يا فضايحك يا مصر ايه الى بيحصل فى مصر ده انا مش مصدق معقول اروح ازور القلعة لاول مرة فى حياتى اشوف الى انا شوفته ده ،اول ما دخلت طبعا التفتيش على ودنه يا معلم وبيحطوا ايديهم فى مناطق غريبة . المهم انى اول شىء كان امامى –ويا ريت ما كان- متحف الشرطة القومى وكنت متخيل انى هشوف انجازات الشرطة عبر التاريخ ولكنى لم اصدق نفسى عندما دخلت لأ شاهد فاترينة من الزجاج وبها صورتين "لريا وسكينة"وتحتهما مقال عنهن وبجوار المقال صورتين صغيرتين لزوج رية وزوج سكينة –يا حلاوة- . اما الفترينة التى بجوارها ففيها صورة "خط الصعيد"ومقال عنه بالعربى وترجمته بالانجليزى وصورة اخرى وهو مقتول وبجواره مساعده –ايه الفضايح دى- . اما الفترينة الثالثة ففيها "سفاح كرموز"صورة له واخرى وهو مقتول والادهى والامر قالب من الجس لوجه وقالب ثانى لكف يده واخر لقدمه ايه الفضايح دى معقول الاجانب الى بيزوروا مصر بيتفرجوا على الحاجات دى انا والله مكنتش مصدق ان ده موجود فى القلعة نفضح روحنا قدام العالم كده اول حاجة يشوفوها الاجانب مجرمين مصر فى العصر المعاصر . وكنت متخيل ان الحجرات الاخرى سوف يكون بها مشاهد لسحل وضرب المواطنين فى الانتخابات الى فاتت وصور لجنود الامن المركزى وهم يمسكون "الشوم"لضرب المتظاهرين ،طبعا ده الى كان مفروض يكون فى الحجرات الاخرى من متحف الشرطة ولكنى شاهدت –وياريت ما شاهدت-حجرة مكتوب عليها "حجرة عمليات التزوير"لتشاهد بالداخل نماذج لعملات مزيفة وصور لاناس يرفعون كف ايديهم ليظهر لك نماذج من اختلاف بصمة الاصابع وفاترينة اخرى بها نموذج لجواز سفر مزيف-يا فضايحك يا مصر وهناك حجرة اخرى –يا لهوى هو فيه تانى-لبعض المسدسات التى قتل بها بعض القواد الانجليز والمصريين على يد الوطنيين المصريين . انا عن نفسى لو كنت سائح اجنبى –ياريت-وشفت هذه الحجرات اول دخولى القلعة لغادرت مصر فورا ولن اعود اليها ،هل يعقل ذلك ابعد ان يشاهد السائح الاهرامات واجدادنا الفراعنة وعبقريتهم يشاهدوا هؤلاء المجرمين فى العصر الحديث………………………..

الصدر

الصدرهو مقدمة الجسدوبئر النفس تتلوى داخلة سراديب تعج بالرغبات والوساوسوالجراثيم والدخان،قد يوجد عقل فارغ لكن الصدر لا يفرغ ابدا والصدرالاعظم نوعان:واحد كان رئيسا لوزراء الباب العالى بالدولة العثمانية ،وواحد عند جين راسل فاتنة السينما الامريكية فى الخمسينيات ،اما اطعم الصدور الحديثة والذها فى الديك الرومى والغزال والحمام والسمان وصدر الدين خا ن هو الممثل التنفيذى لسكرتير عام الامم المتحدة فى السبعينيات وصدر البيت القاعة الامامية وصدرالصحيفة موضوعها الاصلى المفروش على الصفحة الاولى وذات الصدر اسم لمرض اصيبت به عدة غادات سينمائيات فى ادوار منسوخة من غادة الكاميليا اماذات الصدور فهى خفايا النفس التى لا يعلمها الا الله ويتغطى الصدلر بالصديرى تلك القطعة من الملبس الانيقة فى الرجال والتى تتالق بالالوان على صدور الاناث وتتالق بالحديد المضاد للرصاص على صدور ذوى الشان وصدر الامة الجيش وصدر الحكومة فهو الشرطة وصدر القوم بطلهم وصدر السفينة اقوى ما فيها وصدر الام حصن الحنان اما صدر الاب حصن الامان وفى ماثور القول اطعمهم حتى اصدرهم اى اشبعهم وتذا سمى اليوم الرابع من عيد الاضحى يوم الصدر حيث يبلغ الشبع اوجة وقيل انة سمى بذلك لان الناس يصدرون فية عن مكة اى ينصرفون الى بلادهم

بصوا بقى يا بنات

بصوا بقى يا 9مليون بنت عانس فى مصر يا تنفضوا للدهب والشقة ولوازمها يا تقضوها عوانس وخلاص نداء الى كل بنت فى ارض مصر الى قاعدة تقرأروايات عبير وبتحلم بفارس احلامهاالى اديلوا9سنيين مجاش والى عمالة تلبس ضيق وتدهن وجهها بالمساحيق علشان تعجب الشباب وتخليهم يجوا يخطبوها وللاسف محدش معبرها والى كل يوم فى الجامعة او فى الشغل بتحاول تفهم الرجالة انها شخصية مثقفة وبتعترف ان الست بعد ما تتجوز المفروض تقعد فى البيت تربى العيال ،كل ده علشان حد يعبرها ويخطبها -جر رجل يعنى -المهم الى كل هؤلاء البنات اقولهم انتوا السبب عارفين ليه علشان الشروط بيشرطوها الاباء والامهات على العرسان من دهب وشقة والكلام الفاضى ده يخلى الشاب من دول ينفض للجواز ويقولك يا عم وانا هدوش دماغى ليه بالجواز ما ادينى مقضيها فسح ودلع وهزار مع البنات اصحابى بلا نيلة ومش معنى كده انهم مش عاوزين يتجوزوا لكن هما عارفين ان الواحد فيهم لما يفكر فى مشوار الجواز هيقعد 15:20سنة علشان يكون نفسه ،المهم ان سبب المشكلة انتوا يا بنات مش احنا زى ما بتقول حنان الجوهرى -فى الدستور-"التحذير الاخير للرجالة اما تجوزونا يااماحنعمل فيكم زى ما بتوع استراليا حيعملوا فى الكناغير بتوعهم"انتوا السبب يا حنان مش احنا ،احنا الواحد فينا يتمنى يتجوز اربعة مش واحدة بس سهلوها علينا ،وتعالوا نتخيل يا بنات ايه الى هيحصل لو استمر الاباء فى فرض التزامات مجحفة على العرسان ،اولا نسبة العوانس فى مصر هتزيد 3 اضعاف وطبعا هتلاقى بنات بدأت تفقد عقلها من قلة العرسان وتقف البنات بقى عند المؤسسات والجامعات يلقطوا رزقهم -ماتفهمونيش غلط-اقصد يحاولوا يقنعوا اى شاب علشان يتجوز اى واحدة منهموالبنت تقول للشاب "الشقة عليا وهجبلك دهب وانا بشتغل فى وظيفة كويسة وهصرف على البيت بس اتجوزنى ارجوك ،او حتى عرفى وبعد ما نخلف اولاد اعلن الجواز" هيرد عليكى ويقولك"ايه دى احنا كمان هنخلف "تقوليلوا"خلاص مش لازم نقضيها حبوب منع حمل "يقولك"وتفسحينى كل يوم فى مكان مختلف "تقوليلوا" ماشى هوديك جنينة الحيوانات واوريك القرود يرد عليكى "لا مش كفاية شايف قردة قدامى " تحاولى ان تمنعى استفزازك وتقوليلوا"ولا يهمك مش القرد فى عين امه غزال"يقولك "فى عين امه مش فى عينى انا" "تمسكى اعصابك من الغيظ وتقوليلوا"ماشى يا حبى "يقولك متقوليش يا حبى "تسكتى وتقوليلوا"ماشى يا سى السيد هنجوز امتى "يقولك لا خلاص انا هقضيها عزوبية مع نفسى احسن "تقلعى الجزمة وترمحى وراه وانت بتقولى بعد ده كله يا ابن الكلب ، ..........شفتى بعد ما عملتيلوا نفسك قرد برضه رفض وتانى يوم تعملى نفسك قرد برضه-اقصد تعملى نفس المسلسل -علشان حد يجوزك ما خلاص الرجالة بقت زى العملة الصعبة ،شفتوا يا بنات ايه الى هيحصلكم لما تطاوعوا اهلكم على الشروط الى بيفرضوها على عرسانكم -ان كان فيه عرسان-انا لا اقصد انكم تخالفوا اوامرهم بالعافيه لا اقنعوهم ان ده غلط وانكم راضيين بالقليلانا عايز مصلحتكم والله ،انا عن نفسى مش هجوز ابدا وهقضيها عزوبية احسن.................

قابلتها فى دار الوثائق
وكان بينا حب صادق
قلتلها نفسى ابوسك
قالتلى قطر يدوسك
ازاى عايز تبوسنى
لو بتحبنى المفروض تحرسنى
من عيون الناس
قلتلها الحب احساس
وسيبك من النا س وخلينى ابوسك
قالتلى برضه بتكررها يا مجنون
عمرك ما هتبوسنى
الا اما تخطبنى
سكت :اخطبك؟ اشبكك: بدبل
يالا الهبل
انا لا اعرفك
بقولك نفسى ابوسك
نفسى احسك
نفسى اضمك
قالتلى تانى بتكررها يا ملعون
خلاص هتبوسنى بس عند المأذون
قلتلها ايه مأذون؟
بردون
وتانى يوم قالتلى خلاص خطبونى
لمهندس بترول ومنعونى
انى اقابلك تانى
وانسى حبى وحنانى
وأمسح رقمى من موبايلك
لحسن خطيبى جايلك
وانسى انك تبوسنى
لحسن خطيبى يسيبنى

حكاية حقيقيــــــــــة حصلت زمـــــــــــــــــان
بين أهل الاسكندرية واليهود والحكام الرومان
ونقارن الحكاية ديـة ومصرى اليوم الجبـــان
بصوا انا هحكيلكوا حكاية حصلت زمان،بين اهل الاسكندرية واليهود والحكام الرومان،لما كانت الامبراطورية الرومانية بتحكم اغلب العالم زى امريكا الان،ونقلرن بين مقاومة اهل الاسكندرية زمان ،والانسان المصرى الحالى الجبان،الى بيقول انه مغلوب على امره اشكال والوان.
الحكاية ان الامبراطور الرومانى اغسطس كان بيطبق سياسة" فرق تسد" فى مصربمعنى انه يفرق بين اليهود واهل الاسكندرية علشان ميتحدوش عليه فيعطى اليهود امتيازات ومناصب اكثر من اهل الاسكندرية وبكده يكره اهل الاسكندرية اليهود ويكونفيه نزاع بينهم ويروحوا للامبراطور يشكولوا وبكده يكون هو الى متحكم فيهم ومفبش حد متحد عليه –زى الى بيحصل الان فى مصر الحكومة بتخلق نزاع بين المسلمين والمسيحيين وده فى صالحها-المهم ان فى عهد الامبراطور كاليجولا وفى الوقت الى كان اهل الاسكندرية فى قمة غضبهم من اليهود عين هذا الامبراطور شخص يهودى يدعى اجريبا عرش مملكة يهوذا فى عام 38م –وكان اجريبا قبل ذلك يسكن فى الاسكندرية ويعمل فى الربا وسافر بعد غناه الى روما ووطد علاقته بالامبراطور –وعندما مر اجريبا على الاسكندرية فى طريقه من روما الى مقر ملكه وحراسه حواليه ،فرح يهود الاسكندرية عندما رأوه والتفوا حوله ووقر فى ذهن اهل الاسكندرية ان الرومان يميزون اليهود عليهم فى امور كثيرة ،واشتد غيظهم فى صورة ضحك وسخرية ، فماذا فعلوا؟
كان يوجد فى المدينة شخص مجنون يقضى النهار والليل عاريا فقام اهل الاسكندرية برفعه ووضعوا على رأسه قطعة من البردى على شكل تاج وغطوا جسمه بعباءة قذرة بديلا عن عباءة اجريبا الملكية واعطوا المجنون ما يشبه عصى الحكم وقدم له الجميع التحية الملكية،وبدا يتحرك كما لو كان ملكا وتجكع الناس حوله وبدأوا يهتفون "مارن مارن" اى الملك الملك بالسريانية وهذا لانهم يعلمون ان اجريبا الملك اليهودى كان سوريا فقد كان غرضهم السخرية من اليهود وملكهم ،
وما حدث بعد ذلك كان اعظم فقد قام اهل الاسكندرية بنهب وحرق منازل اليهود واجبروا اليهود على اكل لحم الخنزير لانهم فى ذلك الوقت كانوا يحرمون اكله على الرغم من انهم ياكلونه الان –لاحظ تناقض تصرفات اليهود منذ قديم الازل وحتى الان – ثم قاموا بأرسال وفد الى الامبراطور الرومانى –لاحظ ذكاء اهل الاسكندرية –لشرح موقفهم من نزاعاتهم مع اليهود فكانوا يبررون افعالهم مع اليهود أن اليهود يرفضون وضع تماثيل للامبراطور فى معابدهم ،وليس افعالهم هذه مع اليهود من فراغ ولكن لا اليهود كانوا يدسوا لهم المكائد عند الامبراطور ،ولأوضح لك عزيزى القارىء مدى شجاعة اهل الاسكندرية فانهم حينما كانوا يدركون انحياز الامبراطور لليهود كانوا يقومون بسب الامبراطور علانية دون خوف مع انهم يعلموا ان مصيرهم الموت وفعلا كانوا يقتلوا على الفور ورغم ذلك كان الامبراطور يطلب وفدا اخر من اهل الاسكندرية وايضا كان زعماء الوفد يسبون الامبراطور لظلمه ،وفى النهاية لا يكف الاباطرة عن تلقى وفود الاسكندريين ولا يتوقف الاسكندريين عن سب الاباطرة علانية .
انظر عزيزى القارىء مدى شجاعة اهل الاسكندرية المصريين فى ذلك الوقت وبالعكس انظر مدى جبن المصرى الان الى يقولك وانا مالى انا عندى عيال عايز اربيهم حد يقدر على الحكومة وواحد يقولك يا عم ده قدرنا "قدرك انك تكون جبان"

الى كل فتاة قررت تنفض لحب عمرها علشان العريس الغنى والى كل شاب باعته حبيبته هذا المقال

اى بنت بتحب ولد-او بتوهمه انها بتحبه علشان يخطبها- تسمعها بتقولوا كلام يحسسك انها عمرها ما هتسيبه ابدا "انا سعيدة جدا باهتمامك بدراستك وهقف جنبك على طول ومش هسيبك ابدا وهنعيش سوا وهنبنى مستقبلنا مع بعض مش مهم الفلوس احنا هنبدا من الصفر اهم حاجة اننا نكون مع بعض ، عمى كان كده مكنش لاقى حاجه وبدا هو ومراته ودلوقتى بقوا اغنياء " طبعا الكلام ده بنسمعه من كل مزة بنحبها ويا سلام لما تكون متغرب فى بلد تانيه غير بلدك ولا محافظة تانية-علشان جامعتك- تلاقيها بتقولك هات هدومك اغسلهالك علشان مفيش حاجة تشغلك عن دراستك ابدا وتعرف تذاكر ياسلام على الحب ياسلام على المعزة والحنية "ايه ده انت وشك اصفر ليه انت شكلك تعبان هو انت منمتش امبارح كويس ولا شكلك ما اكلتش كويس انا لازم اعملك كله ترم بيها عضمك "ياسلام تحسسك انها ممكن تروح معاك الشقة وتاكلك بنفسها "والدتك عامله ايه كويسه واخواتك واصحابك ان شاء الله كلهم يكونوا كويسين"ايه الطيبه دى وبعد ما انت تدبس فى حبها وتتوهم انها بتموت فيك -هى اصلها بتدور على عريس يا معلم -المهم تجيلك بعد فترة وتقولك معاك 5 اشهر وتيجى تخطبنى انا عماله ارفض عرسان -طبعا خمس اشهر تكون هيا خلصت دراستها- طبعا انت تفاجأ بموضوع الخطوبة وتقولها يا حبيبتى انا مش لاقى اكل ازاى اخطبك تقولك مش مهم احنا هنلبس دبل لحد ما ربنا يسهلك -طبعا عايزه تدبسك يامعلم-تقولها والله انا ممعيش تمن الدبل تقولك دول ميت جنيه تقولها والله انا ممعيش غير تلاتين جنيه هقضى بيهم باقى الشهر ولما متلاقيش منك رجا تقولك خلاص يا حبيبى هنشوف الموضوع ده بكره المهم انك تفاجأ انها جيالك تانى يوم بتقولك "معلش مش هقدر اقابلك تانى بابا منعنى انى اقابلك او اتصل بيك تانى اصله جالى عريس مهندس بترول وهما صمموا على انهم يجوزوهولى "طبعا انت بتتصدم ايه ده بسهولة كده بعتى الحب الى بينا طب فين راح الحب ده نسيتى لما كنتى بتدفعيلى تمن الكشرى الى كنا بناكله انا وانتى سوا نسيتى لما كنتى بتحوليلى رصيد علشان ممعيش فلوس نسيتى لما كنتى بتقوليلى انا وانت واحد مفيش فرق انت تدفع او انا نسيتى الاكل وسندوتشات اللحمة الى كنتى بتجيبهالى من البيت كل ده كان حب ولا عطف ولا طفاسة منى ، شفت يا صاحبى مرة واحدة كده سابتك المزة ونفضتلك وباعتك مع اول عريس ولما تفكر تعمل محاولة اخيرة وتتصل بيها على موبايلها تلاقى عمتها بترد عليك وبتقولك هى دلوقتى مخطوبة ومينفعش تكلمك طبعا انته دلوقتى عرفت انها مكنتش بتحبك كانت عايزه تصطاد عريس وخلاص ولما لقيتك شحات وفقرى قالت خلاص يعنى انا غاويه فقر ادور على واحد غيره على العمو يا صاحبى متزعلش نفسك عمر المزة الى انت وقعت فى حبها عمرها ما هترتاح فى حياتها لانها هتلقى الى ينغص عليها حياتها زى ما نفضتلك وباعتك وانت ياعينى قاعد لوحدك دلوقتى عمال تفكر فيها وبتقول عودى يا منى عودى يا منى

اعلان

اعلان
موجود فى مصر الان
على الحيطة فى كل مكان
اعلان عن بيع انسان
مواطن مصر الغلبان
كان نفسه يعيش فى امان
فى بلد ظلم وطغيان
اعلان عن بيع الحرية
فى بلدنا مصر العربية
اعلان عن بيع القومية
عن بيع الوحدة الوطنية
اعلان عن بيع الكلية
وفى امن الدولة محمية
عن بيع الشرطة المصرية
بس ادفع من الالف مية
اعلان عن بيع التعليم
فى بلدنا ما يجيب مليم
اعلان عن بيع الاعلام
وكله كلام فى كلام
قال ايه ديمقراطية
وشبابنا فى السجون مرمية
اعلان عن بيع الاحلام
وكمان عن بيع الاوهام
للشاب المصرى المتخرج
من الجامعة وعلى فشه بيتفرج
قالولك كتير فرص العمل
بس الكوسة هى الامل
ظبط نفسك يا ابنى وطلع
وادفع
للى ناويلك
على تشغيلك
اعلان عصرى
هنبيع الشعب المصرى
عمال وموظفين
وشباب متخرجين
فى الفقر مقهورين
مين يشترى مين
اعلان
موجود ف مصر الان
على الحيطة فى كل مكان